រាជធានីភ្នំពេញ ថ្ងៃទី២១ ខែមិថុនា ឆ្នាំ២០២៤៖ ធនាគារ  ជេ ត្រាស់ រ៉ូយ៉ាល់ បានចាប់ដៃគូអាជីវកម្មជាមួយក្រុមហ៊ុន KNN (Cambodia) ដែលជាតំណាងចែកចាយផ្តាច់មុខរបស់ក្រុមហ៊ុន JETOUR AUTO នៅកម្ពុជា។ កិច្ចសហការនេះ មានគោលបំណងផ្តល់ជូនអតិថិជននូវដំណោះស្រាយហិរញ្ញវត្ថុប្រកបដោយភាពងាយស្រួល ជាមួយនឹងបទពិសោធន៍ស្នើសុំកម្ចីទិញរថយន្តកាន់តែប្រសើរ។ ពិធីចុះហត្ថលេខាលើអនុស្សរណៈយោគយល់គ្នានៃភាពជាដៃគូអាជីវកម្មនេះ បានប្រព្រឹត្តទៅនៅក្នុងព្រឹត្តិការណ៍សម្ពោធរថយន្ត JETOUR Dashing នៅផ្សារទំនើបអ៊ីអន សែនសុខ រវាងថ្នាក់ដឹកនាំជាន់ខ្ពស់លោក Makoto Kurokawa នាយកប្រតិបត្តិរង នៃធនាគារ ជេ ត្រាស់ រ៉ូយ៉ាល់ ​​​​​​​​​​​​​​និងកញ្ញា​ អ៊ឹង មុយហ្គេច នាយកប្រតិបត្តិប្រតិបត្តិការនៃក្រុមហ៊ុន KNN (Cambodia) និងមានការចូលរួមពីភ្ញៀវកិត្តិយស និងថ្នាក់ដឹកនាំជាន់ខ្ពស់មកពីក្រុមហ៊ុនទាំងពីរ ផងដែរ។

ភាពជាដៃគូនេះ ត្រូវបានរៀបចំឡើងដើម្បីជួយសម្រួលដល់ប្រជាជនកម្ពុជា ក្នុងការទិញរថយន្តថ្មី។ ធនាគារ ជេ ត្រាស់ រ៉ូយ៉ាល់ នឹងផ្តល់អត្ថប្រយោជន៍ជាច្រើនដល់ម្ចាស់រថយន្ត រួមមាន ចំនួនទឹកប្រាក់កម្ចីកាន់តែខ្ពស់ និងដំណើរការឆាប់រហ័ស ដែលអាចផ្ដល់ជូនរហូតដល់ចុងឆ្នាំនេះ។

អតិថិជនដែលទិញរថយន្ត JETOUR ពីក្រុមហ៊ុន KNN (Cambodia) នឹងអាចទទួលបានប្រាក់កម្ចីរថយន្តរហូតដល់ 85% នៃតម្លៃរថយន្ត ជាមួយនឹងរយៈពេលកម្ចីរហូតដល់ 84 ខែ ក្នុងអត្រាការប្រាក់ប្រកួតប្រជែង និងឥតគិតថ្លៃលើកម្រៃសេវាផ្លូវច្បាប់ថែមទៀតផង។ លើសពីនេះទៅទៀត អតិថិជននឹងទទួលបានការផ្តល់ជូនពិសេសដែលកំពុងមានស្រាប់ពីធនាគារ ជេ ត្រាស់ រ៉ូយ៉ាល់ ដែលក្នុងនោះរួមមានបណ្ណទឹកប្រាក់ 500 ដុល្លារអាមេរិក (ស្ទីកគ័រការពារថ្នាំ និងការពារកំដៅ) សម្រាប់ទំហំកម្ចីចាប់ពី 20,000 ដុល្លារអាមេរិកឡើងទៅ ឬបណ្ណទឹកប្រាក់ 500 ដុល្លារអាមេរិក (លាងរថយន្ត)។

លោក Makoto Kurokawa នាយកប្រតិបត្តិរង នៃធនាគារ ជេ ត្រាស់ រ៉ូយ៉ាល់ បានមានប្រសាសន៍ថា៖ “ធនាគារ ជេ ត្រាស់ រ៉ូយ៉ាល់ មានសេចក្តីសោមនស្សរីករាយក្នុងការប្រកាសពីភាពជាដៃគូអាជីវកម្មជាមួយក្រុមហ៊ុន KNN (Cambodia) ក្នុងគោលបំណងសម្រួលដំណើរការទិញរថយន្តថ្មី ឱ្យកាន់តែមានភាពងាយស្រួលងាយស្រួល

សម្រាប់អតិថិជន តាមរយៈកម្ចីទិញរថយន្ត ដែលមិនមានភាពស្មុគស្មាញ។ តាមរយៈភាពជាដៃគូនេះ អតិថិជននឹងអាចក្លាយជាម្ចាស់រថយន្ត JETOUR Dashing ដ៏ថ្មីស្រឡាង ព្រមជាមួយនឹងអត្ថប្រយោជន៍ជាច្រើន ដើម្បីបំពេញតាមតម្រូវការរបស់ពួកគាត់”។

កញ្ញា​ អ៊ឹង មុយហ្គេច នាយកប្រតិបត្តិប្រតិបត្តិការនៃក្រុមហ៊ុន KNN (Cambodia) ក៏បានមានប្រសាសន៍ថាបន្ថែមផងដែរថា៖ “ធនាគារ ជេ ត្រាស់ រ៉ូយ៉ាល់ គឺជាធនាគារដំបូងបំផុត ដែលយើងបានសហការជាមួយ ដើម្បីផ្តល់ជាជម្រើសក្នុងការទទួលបានកម្ចី សម្រាប់អតិថិជនរបស់យើង។ ភាពជាដៃគូនេះ បានបង្ហាញពីការចាប់ផ្តើមដ៏រីករាយបំផុត ហើយយើងសង្ឃឹមថា នឹងមានកិច្ចសហការជាបន្តបន្ទាប់ទៀតនាពេលខាងមុខ​ ដើម្បីជាប្រយោជន៍ដល់អតិថិជនរបស់ក្រុមហ៊ុនទាំងពីរ។

អតិថិជនអាចអញ្ជើញចូលទៅកាន់ស្តង់ដាក់បង្ហាញរថយន្ត JETOUR Dashing ដើម្បីទទួលបានព័ត៌មានលម្អិតបន្ថែមអំពីរថយន្ត ក្នុងព្រឹត្តិការណ៏ដាក់សម្ពោធរយៈពេលពីរថ្ងៃនេះផងដែរ។